ថៃ៖ តុលាការធម្មនុញ្ញថៃបានព្យួរមេដឹកនាំគណបក្ស Move Forward និងបេក្ខភាពនាយករដ្ឋមន្ត្រី លោក Pita Limjaroenrat ពីតួនាទីជាសមាជិកសភាតំណាងរាស្រ្ត ដើម្បីពិចារណាលើបណ្តឹងមួយដែលពាក់ព័ន្ធនឹងការកាន់កាប់ភាគហ៊ុនមរតករបស់លោក Pita។ នេះបើតាមសារព័ត៌មានបាងកកប៉ុស្តិ៍។

សេចក្តីប្រកាសរបស់តុលាការនៅថ្ងៃទី១៩ ខែកក្កដា ឆ្នាំ២០២៣ បន្ទាប់ពីទទួលយកសម្រាប់ការពិចារណាលើបណ្តឹងដែលពាក់ព័ន្ធនឹងការកាន់កាប់ភាគហ៊ុនមរតករបស់លោក Pita នៅក្នុងក្រុមហ៊ុនប្រព័ន្ធផ្សព្វផ្សាយ iTV Plc ដែលតាមរដ្ឋធម្មនុញ្ញថៃហាមសមាជិកសភាមិនឱ្យកាន់ភាគហ៊ុនក្នុងស្ថាប័នសារព័ត៌មាន។

គណៈកម្មាធិការរៀបចំការបោះឆ្នោតថៃកាលពីថ្ងៃទី១២ ខែកក្កដា ឆ្នាំ២០២៣ បានស្នើដល់តុលាការថា លោក Pita ត្រូវបានដកហូតឋានៈសមាជិកសភា ដោយសារការកាន់កាប់ភាគហ៊ុនរបស់គាត់នៅក្នុងអង្គការប្រព័ន្ធផ្សព្វផ្សាយ។ ស្ថាប័នបោះឆ្នោតក៏បានស្នើឲ្យតុលាការព្យួរលោកពីកាតព្វកិច្ចសមាជិកសភាដោយរង់ចាំការសម្រេចរបស់ខ្លួន។

ដោយឡែក ខាងក្រៅបាតុករគាំទ្រលោក Pita ប្រហែល ១៥០នាក់បានចូលទៅជិតទ្វារសភា ហើយសម្តែងការខកចិត្តរបស់ពួកគេ ខណៈបាតុករខ្លះគប់ដបទឹកប្លាស្ទិក ដោយប៉ូលីសត្រួតពិនិត្យបានបង្កើតជួរការពារនៅខាងក្នុងច្រកទ្វារ។

គួរឱ្យដឹងដែរថា លោក Pita Limjaroenrat ត្រូវការការគាំទ្រពីសភាទ្វេភាគីជាងពាក់កណ្តាលដើម្បីជាប់ជានាយករដ្ឋមន្ត្រីទី៣០ របស់ថៃ ប៉ុន្តែឧបសគ្គរបស់លោកគឺផែនការវិសោធនកម្មមាតា១១២ ដែលជាច្បាប់ការពារព្រះមហាក្សត្រនិងរាជបល្ល័ង្កថៃ ដែលធ្វើឱ្យសមាជិកព្រឹទ្ធសភាដែលត្រូវបានតែងតាំងដោយយោធាប្រឆាំងនឹងរូបលោក៕